Մեր հյուրն են համալսարանի նոր աշխատակցուհիները

Նրանց հետ մեր առաջին հարցազրույցը նպատակ ունի ներկայացնել վերջիններիս` շնորհավորելով նրանց կանանց միջազգային օրվա առիթով:

1. Դուք բժշկական համալսարան եք եկել վերջերս, մի քանի խոսքով ներկայացրեք  այն բնագավառը, որը ղեկավարում եք:
2. Դժվար չէ՞ պատասխանատու աշխատանքի համատեղումը ընտանեկան գործերին: 
3. Ինչպիսի՞ն կցանկանայիք լիներ մեր երկիրը և նրա երիտասարդ սերունդը: Կնոջ տեսանկյունով գնահատեցեք մեր երկրի և նրա աճող սերնդի ապագան:
4. Ի՞նչն է ձեր կարծիքով հայ կնոջը տարբերակում մյուս ազգերի կանանցից:

ԳԱԼԻՆԱ ՎԱՐԴԱՆԻ ԴԱԲԱԵՎԱ 

հետբուհական և շարունակական կրթության ֆակուլտետի ուսումնական բաժնի պետ

1. Ես ոչ թե վերջերս եկել եմ, այլ վերջերս վերադարձել եմ իմ, այսպես ասած,«հայրական տունը», չէ՞ որ ավարտել եմ Երևանի պետական բժշկական ինստիտուտի բուժական ֆակուլտետը և աշխատել եմ ասիստենտ օնկոլոիգայի ամբիոնում:
   Հետբուհական մասնագիտական և շարունակական կրթության ուսումնական բաժինը կազմակերպում և ապահովում է Հայաստանում բարձրագույն և միջին մասնագիտական կրթություն ունեցողների հետբուհական մասնագիտական և շարունակական կրթությունն առողջապահության ոլորտում:
2. Իհարկե դժվար է, բայց պետք չէ վախենալ դժվարություններից: Աշխատանքը և ընտանիքը չպետք է մրցեն և խանգարեն մեկը մյուսին: Ամեն մեկը իր տեղը ունի և պետք է գտնել այն ոսկի միջինը, որի առկայության դեպքում չեն տուժի ո´չ աշխատանքը, ո´չ ընտանիքը:
3. Ուզում եմ ապրել հզոր երկրում: Չեմ ուզում տարանջատել երիտասարդներին ընդհանուր ազգից: Եթե հարևան որոշ ազգերին կարելի է բնորոշել որպես «տաշի-տուշի-խաշի-լավաշի», ապա հայ ազգը միշտ եղել է ստեղծող: Դեռևս ռուս թագավոր Պետրոս Առաջինը` շատ լավ հասկանալով դա, իր հրամանագրում հատուկ շեշտել էր, որ հայերին պետք է օգնել և ամեն ինչով աջակցել: 
   Հայ ազգը նման է խաղողի ճյուղի, այն կարելի է ծռել, բայց դժար է կոտրել: Պահ է գալիս, երբ ճյուղը նորից շիվ է տալիս, բարձրանում է և ծաղկում: Շատ հնադարյան ազգեր բնաջնջվել են երկրի երեսից` չդիմանալով բախտի հարվածներին, իսկ հայ ազգը միշտ եղել է և կլինի`շնորհիվ իր սերունդների:
4. Զոհաբերությունը, անձնազոհությունը: Որ ազգի կինը կերգի օրորոցայինը, ասելով.«Զարթնիր, լաո…» և օրորոցից «կուղարկի» երեխային կռվի հայրենիքը պաշտպանելու:

ՄԱՐԻՆԵ ԳԵՎՈՐԳԻ ՀՈՎՀԱՆՆԻՍՅԱՆ

հանրային առողջության ֆակուլտետի դեկան, դոցենտ

1. Ես ներկայացնում եմ հանրային առողջության բնագավառը, որը մեր համալսարանում նոր է: Ֆակուլտետը հիմնադրվել է 2011 թվականին և պատրաստում է մագիստրոսներ հանրային առողջության ոլորտում: Հանրային առողջության մասնագետները աշխատում են հանրային առողջության կազմակերպման և կառավարման, ինչպես նաև հիգիենայի և  համաճարակաբանության ոլորտներում, առողջապահության նախարարության, քաղաքապետարանների, մարզպետարանների, մասնավոր և պետական բուժհաստատությունների ղեկավար օղակներում, պետական հակահամաճարակային տեսչության կենտրոններում, ինչպես նաև տեղական և միջազգային կազմակերպություններում` որպես առողջապահական տարբեր ծրագրերի ղեկավարներ, համակարգողներ և այլն: Մագիստրատուրայում կրթության տևողությունը 2 տարի է, որի  ընթացքում մագիստրոսը ստանում է բազմակողմանի գիտելիքներ հանրային առողջության բնագավառում: Հանրային առողջության մագիստրոսական ծրագիրը կազմված է Հանրային առողջության դպրոցների միության (Association of Schools of Public Health (ASPH)) կողմից առաջարկված ծրագրի հիման վրա: Ես ինքս հանդիսանում եմ Հայաստանի ամերիկյան համալսարանի հանրային առողջության ֆակուլտետի շրջանավարտ և աշխատել եմ այդ ոլորտում որպես տարբեր առողջապահական ծրագրերի համակարգող և ղեկավար: 
2. Գտնում եմ, որ ժամանակը ճիշտ տնօրինելու դեպքում հնարավոր է համատեղել աշխատանքը և ընտանեկան գործերը: Փորձը ցույց է տալիս, որ կինը հաջողությամբ կարողանում է իրականացնել տարբեր աշխատանքներ` չնայած մեծ ծանրաբեռնվածությանը: 
3. Ինչպես ցանկացած հայ, ես կուզենայի տեսնել մեր երկիրը ուժեղ և բարգավաճող: Ես կարծում եմ, որ Հայաստանի նման երկրի ապագան կրթված երիտասարդությունն է: Հայաստանը ունի սահմանափակ բնական և էներգետիկ ռեսուրսներ, և մենք այսօր արժեվորում ենք որակյալ կրթությունը, որովհետև վաղվա օրը կրթված երիտասարդությանն է: 
4. Հայ կնոջ համար առաջին տեղում միշտ իր ընտանիքն է: Հայ կանայք առանձնանում են իրենց առանձնահատուկ նվիրումով` մտերիմներին, բարեկամներին: Միաժամանակ հայ կանայք, մնալով միշտ կանացի, կարողանում են հասնել մեծ հաջողությունների նաև իրենց մասնագիտական բնագավառում: Իմ կարծիքով համատեղելու այդ յուրօրինակ շնորհքը մեզ տարբերակում է այլ ազգերի կանանցից:

ՄԱՐԻՆԵ ԳՐԻՇԱՅԻ ՀԱՅՐԱՊԵՏՅԱՆ

ուսումնամեթոդական վարչության պետ 

1. Շուտով կլրանա մեկ տարին, որ աշխատում եմ Երևանի Մխիթար Հերացու անվան պետական բժշկական համալսարանում, որպես ուսումնական բաժնի պետ: Համալսարանն ինձ համար հարազատ բնագավառ է, քանի որ այս բուհի շրջանավարտ եմ: Սիրում եմ իմ աշխատանքը, հաճույքով եմ կատարում իմ աշխատանքային պարտականությունները: Պետք է նշեմ, որ ուսումնական բաժինը բավականին մեծ աշխատանքային իրավասություններ ունի: Ամբողջ ուսումնական տարվա կտրվածքով բաժինն աշխատում է ծանրաբեռնված:
   Ուսումնական բաժինը վերջերս վերանվանվեց ուսումնամեթոդական վարչության, իր մեջ ներառելով պրակտիկայի բաժինը: Վարչության գործառույթներն այնքան շատ են, որ փոքրիկ հոդվածի սահմաններում համարյա անհնար է ներկայացնել: Կցանկանայի նշել, որ բաժինը աշխատում է կարգապահորեն և համակարգված` շնորհիվ բաժնի լավագույն աշխատակիցների, որոնք մշտապես պահպանում են իրենց բարի փոխհարաբերությունները միմյանց և համալսարանի աշխատակիցների հանդեպ:
2. Կարող եմ վստահորեն ասել, որ իմ աշխատանքի համատեղումը ընտանեկան գործերին զուգահեռ դժվարություններ չի ստեղծում, քանի որ առողջապահության կազմակերպման բնագավառում աշխատում եմ երկար տարիներ` սկսած 1996-ից: Ընտանիքս շատ ըմբռնումով է մոտենում իմ պատասխանատու աշխատանքին:
3. Սիրելով իմ հայրենիքը` ցանկանում եմ, որ հայ ժողովուրդը հնարավորինս չափով անհոգ ապրի, աճող սերնդին տեսնենք առողջ, անսպառ էներգիայով լեցուն, և նրանց թող միշտ բարի և արժեքավոր լիցքեր հաղորդվեն:
   Մեր համալսարանի շրջանավարտներին, որպես բժշկական հանրության ներկայացուցիչներ, ցանկանում եմ բազում մասնագիտական հմտություններ և կարողություններ, հաջողություններ, հայրենանվեր, բեղմնավոր, գիտական և պրակտիկ գործունեություն իրենց ընտրած բնագավառում: Եվ յուրաքանչյուրիս երկնակամարում թող միշտ խաղաղություն լինի:
4. Դժվար է տարբերակում մտցնել հայ կնոջ և մյուս ազգերի կանանց միջև: Ինչո՞ւ: Որովհետև բնության կողմից ստեղծված «կին» հասկացությունն իր մեջ ներառում է մի շարք ընդհանրական հատկանիշներ, որոնք բնորոշ են բոլոր կանանց` հեզություն, քնքշություն, բարություն, որը ես պարտադիր եմ համարում բոլոր կանանց բնավորության գծերում: Բոլոր ազգերի հետ դժվարանում եմ համեմատել, քանի որ յուրաքանչյուր ազգ ունի իր ավանդական սովորույթները: Ինչ վերաբերում է հայ կնոջը, ապա կարող եմ ասել, որ նրան առաջին հերթին տրված է ընտանիքին նվիրված լինելու և համբերատար զգացումով ապրելու հատկանիշը:
   Բոլոր կանանց կյանքում էլ լինում են դժվար պահեր, ինձ թվում է, հարկավոր է պարզապես դրանք հաղթահարել, եթե թիկունքիդ կանգնած է ամուր ընտանիք: 
   Մարտի 8-ի կապակցությամբ հայ կանանց ցանկանում եմ մշտապես լինել երջանիկ, առողջ, գեղեցիկ և սիրելի:
   Իսկ մեր փոքրիկ հարցազրույցը ուզում եմ ավարտել Պարույր Սևակի տողերով.
   Հավետ օրհնյալ լինի քո անունը,

Որ հնչում է մերթ «Կին» ու մերթ էլ «Սեր» …

ԿԱՐԻՆԵ ԱՍԼԱՆԻ ԳՐԻԳՈՐՅԱՆ 

կադրերի բաժնի պետ

1. ԵՊԲՀ ռեկտոր պարոն Դերենիկ Հրանտի Դումանյանի կողմից ինձ է վստահվել ղեկավարել մի ստորաբաժանում, որը կարծում եմ յուրաքանչյուր կազմակերպության ամենապատասխանատու և առանցքային ստորաբաժանումներից մեկն է, որտեղ պահանջվում է Աշխատանքային օրենսգրքի, ինչպես նաև կրթական և առողջապահության համակարգի իրավական դաշտի անհրաժեշտ իմացություն, աշխատանքային գործունեության ընթացքում անհրաժեշտ զգոնություն, ինչու չէ` նաև գաղտնապահություն: Այո, ես վերջերս եմ եկել բժշկական համալսարան, բայց բնագավառը, որում աշխատում եմ, նոր չէ ինձ համար: Երկար տարիներ աշխատել եմ ՀՀ առողջապահության նախարարության կրթության, գիտության և անձնակազմի կառավարման վարչությունում: Հետևաբար բավականին ծանոթ եմ ինչպես համակարգին, այնպես էլ մարդկանց, որոնց հետ այժմ աշխատում եմ: Չնայած դրան ավելի խորքային հարցերի քննարկման, ինչու չէ` նաև հղկման և նոր ժամանակաշրջանին համաքայլ` հարցերի ուսումնասիրության և լուծման համար դեռևս, կարծում եմ, ժամանակ է անհրաժեշտ:
2. Չէի ասի, որ հեշտ է համատեղել անձնական կյանքն ու պատասխանատու աշխատանքը, բայց կարծում եմ, եթե մի աշխատանք հաճույքով ես անում, դա արդեն գործի մեծ մասն է: Իմ կարծիքով ամեն գործի հաջողության գրավականը դրա մեջ անսահման սեր դնելն է, լինի դա պատասխանատու պաշտոն թե ընտանիքում սիրելի մարդկանց համար կերակուր պատրաստելը: Դեռ ամուսնացած չեմ, բայց կարծում եմ` ամուսնանալուց հետո էլ նույն բանաձևով աշխատելը շահավետ կլինի թե´ աշխատանքիս և թե´ ընտանիքիս համար:
3. Երկիրը փոփոխությունների հետաքրքիր շրջան է ապրում: Շատ բան է փոխվում մարդկանց մտածելակերպի և գործելակերպի մեջ: Փորձում ենք համաշխարհային ստանդարտներին համապատասխան դառնալ, բայց կարծում եմ` այդ ճանապարհին ճիշտ կլիներ նաև պահել մեր այն արժեքները, որոնք դարերից են գալիս: Համաշխարհային փորձն է ցույց տալիս, որ այն, ինչ փորձությունների միջով պահել պահպանել ենք` ավելի գնահատելի է, քան որոշ նորամուծություններ: Ճիշտ է, հիմա շատ են «քարկոծում» մեր երիտասարդ սերնդին` թե´ օտարամոլության, թե´ կրթվածության ցածր մակարդակ ունենալու մեջ: Բայց միևնույն ժամանակ կան շատ խելացի, լավ երիտասարդներ, կրթված, երբեմն զարմանում ես, թե որքան զարգացած ու տաղանդավոր ապագա բժիշկներ ու ճարտարապետներ, ծրագրավորողներ ու գիտնականներ ունենք:
   Բայց, ավաղ, կարծում եմ, որ շատ շատերը դրսում ավելի մեծ հաջողության և գնահատականի են արժանանում, քան մեզ մոտ:Որպես կին` կարծում եմ, որ լավ կլիներ մեր ունեցածը մեզ մնար:Որեմն եկեք մեր ամբողջ ներուժը գործադրենք, որ մեր տաղանդավոր երիտասարդները իրենց այս երկրի իսկական տերը զգան և օտար ափերում չփնտրեն իրենց արժանի գնահատականը:     
4. Հայ կինը միշտ էլ լավագույն արժանիքներ է դրսևորել բոլոր ժամանակներում, դրսևորելով և´ տոկունություն, և´մեծագույն կամքի ուժ: Իսկ հայ կնոջ ամենակարևոր արժանիքը, կարծում եմ` ընտանիքի նկատմամբ անսահման սերն ու անձնազոհ նվիրվածությունն է, ինչպես նաև` հավատը երբեք չկորցնելու յուրահատուկ կարողությունը: 
   Վերջում, օգտվելով առիթից, թույլ տվեք շնորհավորել ինչպես ԵՊԲՀ-ի, այնպես էլ բոլոր հայ կանաց` մարտի 8-ի կապակցությամբ: Ամենակարևորը եղեք առողջ, և բոլորի աչքերը միշտ թող փայլեն կանացի մեծ երջանկությունից:

Հարցեր, պատասխաններ, մեկնաբանություններ